Shariq Kaifi
guzar raha hai vo lamha to yaad aaya hai
us ek pal se kabhi kitna ḳhauf khaya hai
usi nigah ne ankhon ko kar diya patthar
usi nigah men sab kuchh nazar bhi aaya hai
ye tanz yuun bhi hai ik imtihan mere liye
tire labon se koi aur muskuraya hai
bahe raqib ke aansu bhi mere galon par
ye saneha bhi mohabbat men pesh aaya hai
ye koi aur hai teri taraf sarakta hua
andhera hote hi jo mujh men aa samaya hai
hamare ishq se mar.ub is qadar bhi na ho
ye ḳhuun to ek adakar ne bahaya hai
yahan to ret hai patthar hain aur kuchh bhi nahin
vo kya dikhane mujhe itni duur laaya hai
bahut se bojh hain dil par ye koi aisa nahin
ye dukh kisi ne hamare liye uThaya hai
Leave a Reply