Parveen Shakir
gunge labon pe harf-e-tamanna kiya mujhe
kis kor-chashm-shab men sitara kiya mujhe
zakhm-e-hunar ko samjhe hue hai gul-e-hunar
kis shahr-e-na-sipas men paida kiya mujhe
jab harf-na-shanas yahan lafz-fahm hain
kyuun zauq-e-sher de ke tamasha kiya mujhe
khushbu hai chandni hai lab-e-ju hai aur main
kis be-panah raat men tanha kiya mujhe
di tishnagi khuda ne to chashme bhi de diye
siine men dasht ankhon men dariya kiya mujhe
main yuun sambhal gai ki tiri bevafai ne
be-e’tibariyon se shanasa kiya mujhe
vo apni ek zaat men kul kaenat tha
duniya ke har fareb se milva diya mujhe
auron ke saath mera taaruf bhi jab hua
hathon men haath le ke vo socha kiya mujhe
biite dinon ka aks na ainda ka khayal
bas khali khali ankhon se dekha kiya mujhe
Leave a Reply