gulsitan-dar-gulsitan ab baghban koi nahin
phuul sab tanha khaḌe hain titliyan koi nahin
dhuup achchhi lag rahi hai aaj kitne din ke baad
badalon ka duur tak nam-o-nishan koi nahin
ḳhushk lakḌi ki tarah se jal ga.e saare makan
ye ajab ki saari basti men dhuan koi nahin
naam kya dega koi in be-sabab halat ko
mehrban saare hain lekin mehrban koi nahin
apne ghar se duur rah kar har qadam hai imtihan
kaun kahta hai yahan par imtihan koi nahin
us ne apne shauq se dast-e-dua kaTva diye
us ke chehre par likhi ab dastan koi nahin
raat ki jhilon men utregi kahan se chandni
ham siyah-baḳhton ko bhi aisa guman koi nahin
kya ḳhabar kya ho gaya hai is muammar shaḳhs ko
din Dhale jangal se chunta lakḌiyan koi nahin
ik ajab sa hadsa dekha hai ‘safdar’ shahr men
ḳhushk hain sab ashiyan aur bijliyan koi nahin
Leave a Reply