Hasan Abbas Raza
gulab-e-surḳh se arasta dalan karna hai
phir ik sham-e-visal-angi tujhe mehman karna hai
siva tere har ik shai ko haTa dena hai manzar se
aur is ke ba.ad ḳhud ko be-sar-o-saman karna hai
main apna dasht apne saath le kar ghar se nikla huun
fana karna hai ḳhud ko aur alal-ailan karna hai
vafa ke goshvare men mira pahla ḳhasara tu
tire hi naam par darj aḳhiri nuqsan karna hai
main teri bargah men naqd-e-jan tak nazr kar aaya
to kya kuchh aur bhi mujh ko ada tavan karna hai
‘hasan’ ko bevafa kahne men dukh to hoga tujh ko bhi
magar ye kar-e-mushkil tu ne meri jaan karna hai
Leave a Reply