Gudaz-E-Dil Mata-E-Chashm-E-Nam Tak Bech Dete Hain

Maikash Badayuni

gudaz-e-dil mata-e-chashm-e-nam tak bech dete hain

ye ahl-e-hosh ulfat ka bharam tak bech dete hain

munasib daam lag jaa.en to ḳhuban-e-pari-chehra

badan ke loch aur zulfon ke ḳham tak bech dete hain

ye kaise pasban-e-gulsitan hain jo baharon men

gulon ka rang-o-bu shaḳhon ka tum tak bech dete hain

tijarat par yahan buniyad hai aapas ke rishton ki

yahan ahl-e-karam dast-e-karam tak bech dete hain

ab is se baḌh ke fikr-o-zehn ki tauhin kya hogi

ki arbab-e-qalam apne qalam tak bech dete hain

vaqar-e-mai-kada par jaan de dete hain ham ‘maikash’

haram vaale to namus-e-haram tak bech dete hain