Altaf Hussain Hali
go javani men thi kaj-ra.i bahut
par javani ham ko yaad aa.i bahut
zer-e-burqa.a tu ne kya dikhla diya
jam.a hain har su tamasha.i bahut
haT pe is ki aur pis jaate hain dil
raas hai kuchh us ko ḳhud-ra.i bahut
sarv ya gul aankh men jachte nahin
dil pe hai naqsh us ki rana.i bahut
chuur tha zaḳhmon men aur kahta tha dil
rahat is taklif men paa.i bahut
aa rahi hai chah-e-yusuf se sada
dost yaan thoḌe hain aur bhaa.i bahut
vasl ke ho ho ke saman rah ga.e
menh na barsa aur ghaTa chha.i bahut
jan-nisari par vo bol uTThe miri
hain fida.i kam tamasha.i bahut
ham ne har adna ko aala kar diya
ḳhaksari apni kaam aa.i bahut
kar diya chup vaqi.at-e-dahr ne
thi kabhi ham men bhi goya.i bahut
ghaT ga.iin ḳhud talḳhiyan ayyam ki
ya ga.i kuchh baḌh shakeba.i bahut
ham na kahte the ki ‘hali’ chup raho
rast-goi men hai rusva.i bahut
Leave a Reply