Urooj Zaidi Badayuni
go duur ho chuka huun yaran-e-anjuman se
lekin mafar nahin hai ehsas ki chubhan se
husn-e-nazar ka jaadu sar chaḌh ke bolta hai
asnam-e-marmarin bhi lagte hain sim-tan se
ghuncha hi phuul ban kar jan-e-chaman hua hai
main ne yaqin ki daulat paa.i hai husn-e-zan se
aaj un ke raston men kanTe bichhe hue hain
kal tak jo khelte the rangini-e-chaman se
jaise chaman se nik.hat jaise sadaf se moti
aise juda hua huun main jannat-e-vatan se
main raz-e-rang-o-bu se na-ashna nahin huun
mujh ko gila bhi kab hai phulon ki anjuman se
meri ghazal ‘uruj’ ik tasvir-e-asr-e-nau hai
main ne use sanvara tahzib-e-fikr-o-fan se
Leave a Reply