Yusuf Taqi
ghuTi ghuTi hi sahi meri chaah le lena
safar tavil hai kuchh zad-e-rah le lena
main be-samar hi sahi phir bhi saya-dar to huun
kaḌi ho dhuup to mujh men panah le lena
abhi to saath chalo haan jahan main ruk ja.un
tum us maqam se phir apni raah le lena
kisi maqam pe mumkin hai kaam aa jaa.e
hamare biich jo thi rasm-o-rah le lena
vo kam-savad sahi phir bhi ye nahin asan
ghanim-e-dahr ke sar se kulah le lena
yahi bahut hai ki is daur-e-ibtila men ‘taqi’
kisi ka meri ḳhabar gaah gaah le lena
Leave a Reply