ghunche se muskura ke use zaar kar chale
nargis ko aankh maar ke bimar kar chale
phirte ho baagh se to pukare hai andalib
subh-e-bahar-e-gul pe shab-e-tar kar chale
uthte hue jo dair se li madrase ki raah
tasbih shaikh-e-shahr ki zunnar kar chale
aae jo bazm men to utha chehre se naqab
parvane hi ko shama se bezar kar chale
azad karte tum hamen qaid-e-hayat se
is ke evaz jo dil ko giraftar kar chale
uth kar hamare paas se ghar tak raqib ke
pahunchega vo koi jo hamen maar kar chale
lo khush raho ghar apne men jis shakl se ho tum
do chaar naale ham pas-e-divar kar chale
andoh-o-dard-o-gham ne kiya azm jab idhar
ham ko adam se qafila-salar kar chale
‘sauda’ ne apne khuun ki diyat tum se yak-nigah
chahi to itni baat se inkar kar chale
pyare khuda ke vaste tuk apne dil ke biich
insaf to karo ye kise maar kar chale
Leave a Reply