Ghatega Tere Kuche Mein Waqar Aahista Aahista

Hasrat Mohani

ghatega tere kuche men vaqar ahista ahista

badhega ashiqi ka e’tibar ahista ahista

bahut nadim hue akhir vo mere qatl-e-nahaq par

hui qadr-e-vafa jab ashkar ahista ahista

jila-e-shauq se aina-e-tasvir-e-khatir men

numayan ho chala ru-e-nigar ahista ahista

mohabbat ki jo phaili hai ye nikhat bagh-e-alam men

hui hai muntashir khushbu-e-yar ahista ahista

dil o jaan o jigar sabr o khirad jo kuchh hai paas apne

ye sab kar denge ham un par nisar ahista ahista

ajab kuchh haal ho jaata hai apna be-qarari se

bajate hain kabhi jab vo sitar ahista ahista

asar kuchh kuchh rahega vasl men bhi ranj-e-furqat ka

dil-e-muztar ko aaega qarar ahista ahista

na aenge vo ‘hasrat’ intizar-e-shauq men yunhi

guzar jaenge ayyam-e-bahar ahista ahista