ghaT ga.i hai qadr-o-qimat aaj ke insan ki
ham pe ghalib ho ga.iin makkariyan shaitan ki
jis tarah bhi dekhiye dahshat ka ik mahaul hai
ik khilaune ke barabar haisiyat hai jaan ki
ab dukan bazar men ahl-e-ḳhirad ki band hai
ab ijara-dari hai dana.i par nadan ki
main ne ye sachcha.i jaani hai bahut khone ke ba.ad
dosti achchhi nahin hoti kabhi nadan ki
zindagi ki mushkilon ka hal hai apna hausla
kuchh usi se hoti hai kheti hari arman ki
zor-e-batil ko zamane men mayassar hai farogh
aabru ḳhatre men hai ab sahib-e-iman ki
zinda rahna aaj kal ‘ḳhushtar’ bahut dushvar hai
bala-dasti aaj dekhi jaati hai balvan ki
Leave a Reply