Gharq Na Kar dikhla Kar dil Ko Kan Ka Baala Zulf Ka Halqa

Shah Naseer

gharq na kar dikhla kar dil ko kaan ka baala zulf ka halqa

bahr-e-husn ke hain ye bhanvar do kaan ka baala zulf ka halqa

hala-e-mah pahunche hai nuh us ko nai khat-e-saghar us ko lage hai

aina tum le kar dekho kaan ka baala zulf ka halqa

ahu-e-dil aur tair-e-jan ke haq men ye donon phande hain

ham ko dikha kar tum na chhupao kaan ka baala zulf ka halqa

aaj sivae shane ke yaan kis ka munh hai kaun hai aisa

chhode tumhare chehre par jo kaan ka baala zulf ka halqa

donon tere aariz par din raat mile ye rahte hain

ainak-e-mahr-o-mah na kyuun ho kaan ka baala zulf ka halqa

taish-zani men ye aqrab hai kaala hai vo kundli maare

hazrat-e-dil baaz aao na chhedo kaan ka baala zulf ka halqa

kis ko hisar-e-husn kahun main kis ko khat-e-parkar kahe dil

munh se ulat burqa ko dikha do kaan ka baala zulf ka halqa

ye tire rukh ke bose len aur tarsen miri ankhen ai vaae

dekh ke kyuun rashk aae na mujh ko kaan ka baala zulf ka halqa

aaj zulekha gar yahan hoti dam-e-kamand-o-chah men phansti

dekh mire yusuf ka azizo kaan ka baala zulf ka halqa

kyunki ‘nasir’ arbab-e-sukhan tahsin na karen sun kar ye ghazal

jabki tum is surat se bandho kaan ka baala zulf ka halqa