ain-tabish

Ghani Siyah Zulf Badliyon Si Bila Sabab Mujh Mein Jagti Hai

ghani siyah zulf badliyon si bila sabab mujh men jagti hai

vo ḳhvahish-e-na-murad ab tak tamam shab mujh men jagti hai

vo ek basti jo so gai hai udaas be-nam ho gai hai

ba-harf-o-saut ab bhi chiḳhti hai ba-chashm-o-lab mujh men jagti hai

tire ḳhayalon ki mamlikat ke tamam asnam gir chuke hain

bas ik tamanna-e-kafirana bas ik talab mujh men jagti hai

main us ghaḌi apne aap ka samna bhi karne se bhagta huun

vo ziina ziina utarne vaali shabih jab mujh men jagti hai

is ik nigah men main kab huun larzan use bhi is ki ḳhabar nahin hai

main ḳhud bhi is baat ko nahin janta vo kab mujh men jagti hai

More Poems

Leave a Comment