gham-khana-e-hasti men hai mehman koi din aur
kar le hamen taqdir pareshan koi din aur
mar jaenge jab ham to bahut yaad karegi
ji bhar ke sata le shab-e-hijran koi din aur
turbat vo jagah hai ki jahan gham hai na hairat
hairat-kada-e-gham men hain hairan koi din aur
yaron se gila hai na azizon se shikayat
taqdir men hai hasrat-o-hirman koi din aur
pamal-e-khizan hone ko hain mast baharen
hai sair-e-gul-o-husn-e-gulistan koi din aur
ham sa na milega koi gham-dost jahan men
tadpa le gham-e-gardish-e-dauran koi din aur
qabron ki jo raten hain vo qabron men katengi
abad hain ye zinda shabistan koi din aur
rangini-e-nuzhat pe na maghrur ho bulbul
hai rang bahar-e-chamanistan koi din aur
akhir ko vahi ham vahi zulmat-e-shab-e-gham
hai nur-e-rukh-e-mah-e-darakhshan koi din aur
azad hon aalam se to azad huun gham se
duniya hai hamare liye zindan koi din aur
hasti kabhi qudrat ka ik ehsan thi ham par
ab ham pe hai qudrat ka ye ehsan koi din aur
laanat thi gunahon ki nadamat mire haq men
hai shukr ki us se hain pasheman koi din aur
shevan ko koi khuld-e-barin men ye khabar de
duniya men ab ‘akhtar’ bhi hai mehman koi din aur
Leave a Reply