Gham-E-Dauran Bhi Nahin Hai Gham-E-Jaanan Bhi Nahin

Manzoor Arif

gham-e-dauran bhi nahin hai gham-e-janan bhi nahin

saḳht mushkil men hai ab dil ki gham-e-jan bhi nahin

mujh se naraz hain sab jan-o-jahan-o-janan

main ki dil se bhi juda shai huun pareshan bhi nahin

dil ne kuchh aur kahan aql ne kuchh aur kahi

sun ke donon ki na maani ki main nadan bhi nahin

had-e-imkan-e-tasavvur men sahi mera suragh

lekin ai dil mujhe ab DhunDhna asan bhi nahin

ek vo din ki tiri diid pe qurban thi nigah

ek ye din ki tire vasl ka arman bhi nahin

jaane kis ḳhitta-e-aflak se utra ‘arif’

jo ik insan ki surat bhi hai insan bhi nahin