Aziz Hamid Madni
ghalat-bayan ye faza mahr o kiin darogh darogh
sharab laao gham-e-kufr-o-din darogh darogh
hazar naḳhl-e-guman hain abhi numud-asar
azal ke din se hai kisht-e-yaqin darogh darogh
hadis-e-rashk-e-raqiban hui hai jis ki nazar
main aur us ki lagan ham-nashin darogh darogh
ḳhud apni masti-e-pinhan se haath aata hai
shikar-e-nafa-e-ahu-e-chin darogh darogh
main aur shikva-e-sara.i-e-zaḳhm-e-be-sababi
tu aur dashna tah-e-astin darogh darogh
zarur koi nazar hai harif-e-ḳhud-nigari
vo aur bazm men chin-bar-jabin darogh darogh
malul kuchh gham-e-balidgi se hai varna
sirisht-e-gul ko malal-e-zamin darogh darogh
sada.en diin tujhe ḳhalq-e-ḳhuda ne maqtal se
tiri gali men ḳhabar tak nahin darogh darogh
Leave a Reply