Ghairat-E-Ishq Ka Ye Ek Sahaara Na Gaya

ghairat-e-ishq ka ye ek sahara na gaya

laakh majbur hue un ko pukara na gaya

kya lahu roe to aaya hai baharon ka salam

sirf khvabon se haqaeq ko sanvara na gaya

maarka ishq ka sar de ke bhi sar ho na saka

kaun raahi tha jo is raah men maara na gaya

vo bhi vaqt aata hai saaqi bhi badal jaate hain

mai-kade par kabhi maston ka ijara na gaya

shauq ki baat kab alfaz men Dhal sakti thi

us pari ko kabhi shishe men utara na gaya

kabhi takra diye shishe kabhi chhalka diye jaam

raegan ek bhi saaqi ka ishara na gaya

aaine jitne bhi dekhe vo mukaddar the ‘surur’

jauhar-e-sidq-o-safa phir bhi hamara na gaya

Leave a Comment