baja.e gul mujhe tohfa diya babulon ka
main munharif to nahin tha tire usulon ka
izala kaise karega vo apni bhulon ka
ki jis ke ḳhuun men nashsha nahin usulon ka
nafas ka qarz chukana bhi koi khel nahin
vo jaan ja.ega anjam apni bhulon ka
na.i talash ke ye mir-e-karvan honge
banate jaao yuun hi silsila bagulon ka
ye aaḌi tirchhi lakiren badal nahin saktin
hazar vasta dete raho usulon ka
tamam falsafa-e-ka.enat khul jaate
kahan se TuuT gaya silsila nuzulon ka
inhin se mujh ko mila azm-e-zindagi ‘ajmal’
main janta huun ki kya hai maqam phulon ka
Leave a Reply