ghair udhar lutf-o-karam se mahzuz
ham idhar zulm-o-sitam se mahzuz
hai ḳhushi par tiri mauquf ḳhushi
kyon na huun ranj-o-alam se mahzuz
baiThne vaale tiri mahfil ke
honge kya bagh-e-iram se mahzuz
zindagi se miri duniya aajiz
ek aalam tire dam se mahzuz
asman par hai dimagh-e-va.iz
aaj aaya hai haram se mahzuz
nar-e-dozaḳh se bacha.enge yahi
kyon na hon dida-e-nam se mahzuz
kam hain allah ke bande aise
jo na hon jah-o-hasham se mahzuz
mujh ko gham ain-e-ḳhushi ho jaa.e
aap hon to mire gham se mahzuz
jaate hain ho ke adam ko ghamgin
aate hain log adam se mahzuz
kabhi hansna kabhi rona-dhona
be-ḳhudi hi shab-e-gham se mahzuz
ham to ‘mas.ud’ rahe duniya men
dair se shaad haram se mahzuz
Leave a Reply