gardish ki raqabat se jhagḌe ke liye tha
jo ahd mira titli pakaḌne ke liye tha
jis ke liye sadiyan ka.i tavan men di hain
vo lamha to miTTi men jakaḌne ke liye tha
halat ne ki jaan ke jab dast-darazi
har sulh ka pahlu hi jhagaḌne ke liye tha
munh zoriyan kyuun mujh se saza-var thiin us ko
phailao jahan us ka sukaḌne ke liye tha
qurban thiin balidgiyan naḳhl-e-talab par
kya josh-e-numu aap ukhaḌne ke liye tha
paani ne jise dhuup ki miTTi se banaya
vo da.era-e-rabt bigaḌne ke liye tha
Leave a Reply