Poet
fitna-ḳhu le ga.i dil chhin ke jhaT-paT ham se
aur phir samne aane men hai ghunghaT ham se
aap ka qasd mohabbat hai agar ghairon se
qarz le lijiye thoḌi si mohabbat ham se
so ga.e ham to ham-aghosh hue ḳhvab men vo
ab to karne lage kuchh kuchh vo lagavaT ham se
ek bose ki talab men hui mehnat barbad
vasl ki raat hui yaar se khaTpaT ham se
sulh kar len tire ḳhanjar ke gale mil jaa.en
qatl ke vaqt na rakhiye vo rukavaT ham se
haa.e kis naaz se kahte hain shab-e-vasl men vo
ho chuki baat jo honi thi pare haT ham se
Leave a Reply