fikr-o-ḳhayal men tumhen laane se fa.eda
ḳhud apne ghar men aag lagane se fa.eda
baiThe biTha.e ji ko jalane se fa.eda
ta.amir-e-zindagi ko miTane se fa.eda
fariyad-o-ah nala-o-shevan fuzul hain
shab ki ḳhamoshiyon ko jagane se fa.eda
pamal ho chuke hain ye andaz-e-ashiqi
yuun sar kisi ke dar pe jhukane se fa.eda
achchha nahin hai ishq men ḳhuddariyon ka ḳhuun
jo ḳhud na aa.e us ko bulane se fa.eda
ishq aur ḳhayal-e-ta.an-e-zamana ghalat ghalat
aḳhir batao ham ko zamane se fa.eda
ashkon men bah chuki hai nigah-e-jamal jo
ab be-naqab samne aane se fa.eda
gar javedan nahin hai mohabbat to ai nadim
ye ḳhvab-e-zar-nigar dikhane se fa.eda
bahr-e-sukun men Duub ga.i mauj-e-iztirab
sahil pe gham ka sog manane se fa.eda
main bevafa huun tum ho vafadar haan durust
ai ‘raaj aur baat baḌhane se fa.eda
Leave a Reply