fikr o ehsas ke tapte hue manzar tak aa
mere lafzon men utar kar mire andar tak aa
kahin aisa na ho ruk jaa.en qalam ki sansen
ai miri jan-e-ghazal apne suḳhan-var tak aa
varna ḳhvabon ki tapish tujh ko jala Dalegi
meri jaagi hui nindon ke samundar tak aa
sard kamre ki sulagti hui tanha.i men
meri sanson se nikal kar mire bistar tak aa
dar-o-divar mo.attar hon tiri ḳhushbu se
dil men mat aa magar ik baar mire ghar tak aa
us se kahna hai ‘salim’ agli mulaqat men ye
ḳhvab ban kar kabhi ankhon ke muqaddar tak aa
Leave a Reply