Saulat Zaidi
fikr-e-naqqad-e-adab dirham-o-dinar men hai
kaun si jins-e-suḳhan kucha-o-bazar men hai
garmi-e-husn miri garmi-e-afkar men hai
vo agar mujh men nahin hai mire ash.ar men hai
pa-ba-zanjir mujhe laakh zamana samjhe
mire qadmon ki dhamak vaqt ki raftar men hai
raat qaabu men rahe shahr ke halat magar
laash ik lipTi hui sub.h ke aḳhbar men hai
koi avara sa jhonka koi baghi sa ḳhayal
jis se main ḳhauf-zada huun mire ash.ar men hai
kal isi ghar men ghazal us ne suna.i hogi
jani-pahchani si ḳhushbu dar-o-divar men hai
sahil-e-maslahat-e-vaqt mujhe jaane de
us safine ne pukara hai jo majdhar men hai
vo mohabbat ka mujahid vo muravvat ka shahid
kal ka ‘saulat’ abhi zinda mire afkar men hai
Leave a Reply