Qateel Shifai
fasurdagi ka mudava karen to kaise karen
vo log jo tire qurb-e-jamal se bhi daren
ik aisi raah pe daala hai tere gham ne ki ham
kisi bhi shakl ko dekhen to ruk ke aah bharen
ye kya ki be-sabab aae qaza javani men
ye kyuun na ho ki tumhari kisi ada pe maren
shab-e-alam ke bhi hote hain kuchh na kuchh adab
tadapne vaale sahar tak to intizar karen
us ek baat ke baad ab hazar baat karo
ye dil ke zakhm hain yaaro bharen bharen na bharen
subut-e-ishq ki ye bhi to ek surat hai
ki jis se pyaar karen us pe tohmaten bhi dharen
kuchh aise dost bhi meri nigah men hain ‘qatil’
ki mujh ko baaz rakhen jis se khud usi pe maren
Leave a Reply