Humaira Rahat
fasana ab koi anjam paana chahta hai
taalluq tutne ko ik bahana chahta hai
jahan ik shakhs bhi milta nahin hai chahne se
vahan ye dil hatheli par zamana chahta hai
mujhe samjha rahi hai aankh ki tahrir us ki
vo aadhe raste se laut jaana chahta hai
ye lazim hai ki ankhen daan kar de ishq ko vo
jo apne khvab ki tabir paana chahta hai
bahut ukta gaya hai be-sukuni se vo apni
samundar jhiil ke nazdik aana chahta hai
vo mujh ko azmata hi raha hai zindagi bhar
magar ye dil ab us ko azmana chahta hai
use bhi zindagi karni padegi ‘mir’ jaisi
sukhan se gar koi rishta nibhana chahta hai
Leave a Reply