Chandi Ka Badan Sone Ka Man DhunD Raha Hai

chāñdī kā badan sone kā man DhūñD rahā hai

auroñ maiñ hī achchhā.ī kā dhan DhūñDh rahā hai

kuchh peḌ haiñ nafrat kī havā jin se baḌhī hai

ye baaġh magar ab bhī aman DhūñD rahā hai

sañgam ke ilāqe se hai pahchān hamārī

ye dil to vahī gañg-o-jaman DhūñD rahā hai

anjān se ik ḳhauf ko Dhotā huā insān

apne ko bachāne kā jatan DhūñD rahā hai

gaañv ke har ik ḳhvāb meñ shahroñ kī kahānī

shahroñ meñ jise dekho vatan DhūñD rahā hai

logoñ ne yahāñ raam se sīkhā to yahī bas

har shaḳhs hī sone kā hiran DhūñD rahā hai

Leave a Comment