(1)
na-gahan shor hua
lo shab-e-tar-e-ghulami ki sahar aa pahunchi
ungliyan jaag uthin
barbat o taus ne angdai li
aur mutrib ki hatheli se shuaen phutin
khil gae saaz men naghmon ke mahakte hue phuul
log chillae ki fariyad ke din biit gae
rahzan haar gae
rah-rau jiit gae
qafile duur the manzil se bahut duur magar
khud-farebi ki ghani chhanv men dam lene lage
chun liya raah ke rezon ko khazaf-rezon ko
aur samajh baithe ki bas laal-o-javahar hain yahi
rahzan hansne lage chhup ke kamin-gahon men
ham-nashin ye tha farangi ki firasat ka tilism
rahbar-e-qaum ki nakara qayadat ka fareb
ham ne azurdagi-e-shauq ko manzil jaana
apni hi gard-e-sar-e-rah ko mahmil jaana
gardish-e-halqa-e-gardab ko sahil jaana
ab jidhar dekho udhar maut hi mandlati hai
dar-o-divar se rone ki sada aati hai
khvab zakhmi hain umangon ke kaleje chhalni
mere daman men hain zakhmon ke dahakte hue phuul
khuun men luthde hue phuul
main jinhen kucha-o-bazar se chun laaya huun
qaum ke rahbaro rahzanon
apne aivan-e-hukumat men saja lo in ko
apne guldan-e-siyasat men laga lo in ko
apni sad-sala tamannaon ka hasil hai yahi
mauj-e-payab ka sahil hai yahi
tum ne firdaus ke badle men jahannam le kar
kah diya ham se gulistan men bahar aai hai
chand sikkon ke evaz chand milon ki khatir
tum ne namus-e-shahidan-e-vatan bech diya
baghban ban ke uthe aur chaman biich diya
(2)
kaun azad huaa?
kis ke mathe se siyahi chhuti
mere siine men abhi dard hai mahkumi ka
mother-e-hind ke chehre pe udasi hai vahi
khanjar azad hain sinon men utarne ke liye
maut azad hai lashon pe guzarne ke liye
chor-bazaron men bad-shakl chudailon ki tarah
qimaten kaali dukanon pe khadi rahti hain
har kharidar ki jebon ko katarne ke liye
kar-khanon pe laga rahta hai
saans leti hui lashon ka hujum
biich men un ke phira karti hai bekari bhi
apna khunkhar dahan khole hue
aur sone ke chamakte sikke
dank uthae hue phan phailae
ruuh aur dil pe chala karte hain
mulk aur qaum ko din raat dasa karte hain
rotiyan chaklon ki qahbaen hain
jin ko sarmaya ke dallalon ne
nafa-khori ke jharokon men saja rakha hai
baliyan dhaan ki gehun ke sunahre khoshe
misr o yunan ke majbur ghulamon ki tarah
ajnabi des ke bazaron men bik jaate hain
aur bad-bakht kisanon ki bilakti hui ruuh
apne aflas men munh dhanp ke so jaati hai
ham kahan jaaen kahen kis se ki nadar hain ham
kis ko samjhaen ghulami ke gunahgar hain ham
tauq khud ham ne pahna rakkha hai armanon ko
apne siine men jakad rakkha tufanon ko
ab bhi zindan-e-ghulami se nikal sakte hain
apni taqdir ko ham aap badal sakte hain
(3)
aaj phir hoti hain zakhmon se zabanen paida
tira-o-tar fazaon se barsata hai lahu
raah ki gard ke niche se ubharte hain qadam
taare akash pe kamzor hababon ki tarah
shab ke sailab-e-siyahi men bahe jaate hain
phutne vaali hai mazdur ke mathe se kiran
surkh parcham ufuq-e-subh pe lahrate hain
Leave a Reply