Falak Un Se Jo Badh Kar Bad-Chalan Hota To Kya Hota

Sufi

falak un se jo badh kar bad-chalan hota to kya hota

javan se pesh-rau pir-e-kuhan hota to kya hota

musallam dekh kar yaqub murde se hue bad-tar

jo yusuf ka darida pairahan hota to kya hota

hamara koh-e-gham kya sang-e-khara hai jo kat jaata

agar mar mar ke zinda kohkan hota to kya hota

ata ki chadar-e-gard us ne apne marne valon ko

hui khilqat ki ye surat kafan hota to kya hota

nigah-ban jal gae chaar ankhen hote dekh kar us se

kalim aasa kahin vo ham-sukhan hota to kya hota

bada bad-ahd hai is shohrat-e-ifa-e-vada par

agar mash.hur tu paiman-shikan hota to kya hota

muqaddar men to likkhi hai gadai ku-e-janan ki

agar ‘afsar’ shahanshah-e-zaman hota to kya hota