Dagh Dehlvi
falak deta hai jin ko aish un ko gham bhi hote hain
jahan bajte hain naqqare vahin matam bhi hote hain
gile shikve kahan tak honge aadhi raat to guzri
pareshan tum bhi hote ho pareshan ham bhi hote hain
jo rakkhe charagar kafur duuni aag lag jaae
kahin ye zakhm-e-dil sharminda-e-marham bhi hote hain
vo ankhen samri-fan hain vo lab isa-nafas dekho
mujhi par sehr hote hain mujhi par dam bhi hote hain
zamana dosti par in hasinon ki na itrae
ye alam-dost aksar dushman-e-alam bhi hote hain
ba-zahir rahnuma hain aur dil men bad-gumani hai
tire kuche men jo jaata hai aage ham bhi hote hain
hamare ansuon ki abdari aur hi kuchh hai
ki yuun hone ko raushan gauhar-e-shabnam bhi hote hain
khuda ke ghar men kya hai kaam zahid bada-khvaron ka
jinhen milti nahin vo tishna-e-zamzam bhi hote hain
hamare saath hi paida hua hai ishq ai naseh
judai kis tarah se ho juda tavam bhi hote hain
nahin ghatti shab-e-furqat bhi aksar ham ne dekha hai
jo badh jaate hain had se vo hi ghat kar kam bhi hote hain
bachaun pairahan kya charagar main dast-e-vahshat se
kahin aise gareban daman-e-maryam bhi hote hain
tabiat ki kaji hargiz mitae se nahin mitti
kabhi sidhe tumhare gesu-e-pur-kham bhi hote hain
jo kahta huun ki marta huun to farmate hain mar jaao
jo ghash aata hai to mujh par hazaron dam bhi hote hain
kisi ka vada-e-didar to ai ‘dagh’ bar-haq hai
magar ye dekhiye dil-shad us din ham bhi hote hain
Leave a Reply