ek samundar ek kinara ek sitara kaafi hai
is manzar men us ke alava koi akela kaafi hai
dene vaala jholiyan bhar bhar deta hai to us ka karam
lene vaale kab kahte hain daata itna kaafi hai
ek ghalat-andaz nazar se gulshan gulshan daagh jalen
shabnam shabnam rulvane ko ek hi jumla kaafi hai
ḳhushk labon par pyaas saja.e bahr-e-asham nahin hain ham
ham jaison ko tishna-labi men ek hi dariya kaafi hai
ab to aur bhi duniya.en hain muntazir-e-arbab-e-havas
un logon ka qaul nahin hai ham ko ye duniya kaafi hai
shahr-e-vafa se dasht-e-junun tak chahe jitne marahil huun
vahshat ke to dusre ruḳh par ek daricha kaafi hai
husn-e-suḳhan baaqi rakhne ko kuchh ib.ham zaruri hai
kahte kahte ruk jaane men hai jo ishara kaafi hai
us ke afsun us ke fasane donon ko mas.hur rakhen
aql-o-junun ki dahlizon par ḳhvab ka pahra kaafi hai
ek sabha dil valon ki ik taan rasile logon ki
shahr ke raushan rakhne ko itna sa ujala kaafi hai
Leave a Reply