Sheikh Ibrahim Zauq
ik sadma dard-e-dil se miri jaan par to hai
lekin bala se yaar ke zaanu pe sar to hai
aana hai un ka aana qayamat ka dekhiye
kab aaen lekin aane ki un ke khabar to hai
hai sar shahid-e-ishq ka zeb-e-sinan-e-yar
sad shukr baare nakhl-e-vafa barvar to hai
manind-e-shama girya hai kya shughl-e-turfa-tar
ho jaati raat us men bala se basar to hai
hai dard dil men gar nahin hamdard mere paas
dil-soz koi gar nahin soz-e-jigar to hai
ai dil hujum-e-dard-o-alam se na tang ho
khana-kharab khush ho ki abad ghar to hai
turbat pe dil-jalon ki nahin gar charagh o gul
siine men sozish-e-dil o dagh-e-jigar to hai
ghaeb men jo kaha so kaha phir bhi hai ye shukr
khamosh ho gaya vo mujhe dekh kar to hai
kashti-e-bahr-e-gham hai mire haq men tegh-e-yar
kar deti ek dam men idhar se udhar to hai
vo dil ki jis men soz-e-mohabbat na hove ‘zauq’
behtar hai sang us se ki us men sharar to hai
Leave a Reply