ek qatra na kahin ḳhuun ka baha mere ba.ad
zang-alud hui tegh-e-jafa mere ba.ad
kyuun har ik moḌ pe hota hai ghuTan ka ehsas
tang kyuun hone lagi meri faza mere ba.ad
dekhte dekhte hi maand paḌe shams-o-qamar
ḳhud se bezar hue sub.h-o-masa mere ba.ad
har taraf zardi-e-ruḳhsar nazar aati hai
kahin raushan na mila rang-e-hina mere ba.ad
ruk gaya qafila-e-umr-e-subuk-rau shayad
dekh ḳhamosh hai avaz-e-dara mere ba.ad
zindagi bhar na kiya yaad kisi ne aur ab
puchhte hain vo mere ghar ka pata mere ba.ad
umr bhar us ko sambhale hue rakkha main ne
gir na jaa.e kahin divar-e-ana mere ba.ad
ab bhi kya is men hai abad syahi ‘hamdam’
mere virane ka kya haal hua mere ba.ad
Leave a Reply