Ek Lahr Mili Apne Bahao Se Nikal Kar

ik lahr milī apne bahāo se nikal kar

chūmā hai use maiñ ne bhī naav se nikal kar

raushan haiñ tire sho.ala-e-sad-rang meñ varna

ham kab ke bujhe hote alaav se nikal kar

maiñ sochtā huuñ zaḳhm agar bhar gayā dil kā

ye dard kahāñ jā.egā ghaav se nikal kar

bārānī ilāqoñ kī tarah āñkhoñ kī aadat

ham jaa.eñ kahāñ apne kaTāo se nikal kar

maiñ dekhtā huuñ is liye aflāk kī jānib

kitnā safar hai arzī paḌāv se nikal kar

Leave a Comment