Sufi
ik khalish ko hasil-e-umr-e-ravan rahne diya
jaan kar ham ne unhen na-mehrban rahne diya
kitni divaron ke saaye haath phailate rahe
ishq ne lekin hamen be-khanuman rahne diya
arzu-e-ishq bhi bakhshi dilon ko ishq ne
fasla mere aur un ke darmiyan rahne diya
apne apne hauslon apni talab ki baat hai
chun liya ham ne unhen saara jahan rahne diya
ye bhi kya jiine men jiina hai baghair un ke ‘adib’
shama gul kar di gai baaqi dhuan rahne diya
Leave a Reply