Poet
ek ik saans men sadiyon ka safar kaTte hain
ḳhauf ke shahr men rahte hain so Dar kaTte hain
pahle bhar lete hain kuchh rang tumhare us men
aur phir ham usi tasvir ka sar kaTte hain
ḳhvab muTThi men liye phirte hain sahra sahra
ham vahi log hain jo dhuup ke par kaTte hain
saunp kar us ko tire dard ke saare mausam
phir usi lamhe ko ham zindagi-bhar kaTte hain
tu nahin hai to tire shahr ki tasvir men ham
saare virane bana dete hain ghar kaTte hain
us ki yadon ke parindon ko uḌa kar ‘az.har’
dil se ab dard ka ik ek shajar kaTte hain
Leave a Reply