Afzal Naved
ik dhan ko ek dhan se alag kar luun aur gaun
sanson ka ik charagh kahin dhar luun aur gaun
gandhar ki shua chunun phir shuaon se
yaqut sat.h-e-sang se chun kar luun aur gaun
sar-chashma-e-vajud ko hargiz na chhedun main
koyal se ik irada-e-tevar luun aur gaun
bheron men din nikalta dikhaun main dahr ko
aur sub.h tak charaghon ki lo kar luun aur gaun
aur phail jaun charon taraf bazgasht sa
lab par tira vazifa-e-azbar luun aur gaun
aur dasht mere saath rahe bahta megh men
barish men apne vaste ik ghar luun aur gaun
koyal pukarti rahe jamun ke ped par
man men kisi nafas ka subu bhar luun aur gaun
kalyan ke ujale men phirti hai shab kahin
main shaam hi se kandhe pe chadar luun aur gaun
aa jaun apni gardish-e-sayyargan ko main
chakkar pe ek dusra chakkar luun aur gaun
ye vaqt hai bahae hue kaenat ko
naddi ki lahron se koi jhalar luun aur gaun
rahti hai bas-ki raakh zamanon ki taaq par
main bhi charagh-e-hijr ka chakkar luun aur gaun
jalne lage jo shahr to saara undel duun
ja kar kisi kinare se phir bhar luun aur gaun
angan men jagte hain gul-o-lala raat bhar
main bhi kisi ke kanton ka bistar luun aur gaun
avaz chakna-chur ho shor-e-lahad ke biich
sang-e-mazar se koi thokar luun aur gaun
milna kisi se rakhna-e-avargi to hai
mil kar kisi se dusra mehvar luun aur gaun
rukhsat ke vaqt tuut gaya jo pahad tha
siine men tere paanv ke kankar luun aur gaun
lagne laga hujum-e-shar-angezi har taraf
yaksui-e-khumar ko hi sar luun aur gaun
jo jo parinda baitha hua tha so ud gaya
pahlu men apna khali sa pinjar luun aur gaun
din raat men bade bade aate hain inqalab
lekin main tera naam barabar luun aur gaun
jhukne lagi hai qaus-e-quzah sub.h-dam ‘naved’
ye tokari gulab ki sar par luun aur gaun
Leave a Reply