ik baar jo bichhḌe vo dobara nahin milta
mil jaae koi shaḳhs to saara nahin milta
us ki bhi nikal aati hai iz.har ki surat
jis shaḳhs ko lafzon ka sahara nahin milta
phir dubna ye baat bahut soch lo pahle
har laash ko dariya ka kinara nahin milta
ye soch ke dil phir se hai amada-e-ulfat
har baar mohabbat men ḳhasara nahin milta
kyuun log bulaenge hamen bazm-e-suḳhan men
apna to kisi se bhi sitara nahin milta
vo shahr bhala kaise lage apna jahan par
ik shaḳhs bhi dhunde se hamara nahin milta