ik baat bahut ḳhaas thi chehron ke safar men
TuuTe hue aa.ine mile rahguzar men
rahta huun ujalon ke andheron ke safar men
ye kis ne mujhe baanT diya sham-o-sahar men
divangi-e-shauq ki azmat hai nazar men
sahraon ki tasvir laga rakkhi hai ghar men
jab tak ki na aa ja.un main sahil ki nazar men
rahne de mujhe gardish-e-taqdir bhanvar men
aa jaa.e agar baal to miT jaate hain jauhar
main rakhta nahin TuuTa hua aa.ina ghar men
baḌh ja.egi ai ham-safaro duri-e-manzil
guzri hui baton ko na doharao safar men
ho pyaar to asani se aa sakta hai ‘saulat’
jannat ka maza chhoTe se TuuTe hue ghar men
Leave a Reply