Ek Baat Bahut KHas Thi Chehron Ke Safar Mein

ik baat bahut ḳhaas thī chehroñ ke safar meñ

TuuTe hue aa.ine mile rāhguzar meñ

rahtā huuñ ujāloñ ke añdheroñ ke safar meñ

ye kis ne mujhe baañT diyā shām-o-sahar meñ

dīvāngī-e-shauq kī azmat hai nazar meñ

sahrāoñ kī tasvīr lagā rakkhī hai ghar meñ

jab tak ki na aa jā.ūñ maiñ sāhil kī nazar meñ

rahne de mujhe gardish-e-taqdīr bhañvar meñ

aa jaa.e agar baal to miT jaate haiñ jauhar

maiñ rakhtā nahīñ TuuTā huā aa.ina ghar meñ

baḌh jā.egī ai ham-safaro dūrī-e-manzil

guzrī huī bātoñ ko na doharāo safar meñ

ho pyaar to āsānī se aa saktā hai ‘saulat’

jannat kā maza chhoTe se TuuTe hue ghar meñ

Leave a Comment