ik ajab hi silsila tha main na tha
mujh men koi rah raha tha main na tha
main kisi ka aks huun mujh par khula
aa.ine ka aa.ina tha main na tha
main tumhara mas.ala hargiz na tha
ye tumhara mas.ala tha main na tha
phir khula main donon ke mabain huun
ik zara sa fasla tha main na tha
ek ziine par qadam jaise ruken
tiri rah ka marhala tha main na tha
vo jo ik gum-karda-rah tha dasht men
vo to mera rahnuma tha main na tha
unchi nichi raah mahv-e-raqs thi
Dagmagata rasta tha main na tha
tum ne jis se samt puchhi dasht men
vo koi qibla-numa tha main na tha
ye kahani thi magar meri na thi
vo jo mard-e-majra tha main na tha
main to apni shaḳh se tha muttasil
paat jo vaqf-e-hava tha main na tha
ḳhud se mil kar bujh gaya tha main to kal
diip jo shab bhar jala tha main na tha
main na tha kahta tha jo har baat par
vo to koi dusra tha main na tha
main to ‘ahmad’ kab se mahv-e-yas huun
kal jo mahfil men hansa tha main na tha
Leave a Reply