Ek Aisa Waqt Bhi Sahra Mein Aane Wala Hai

ik aisā vaqt bhī sahrā meñ aane vaalā hai

ki rāsta yahāñ dariyā banāne vaalā hai

vo tīrgī hai ki chhaTtī nahīñ kisī sūrat

charāġh ab ke lahū se jalāne vaalā hai

tumhāre haath se tarshā huā vajūd huuñ maiñ

tumhī batāo ye rishta bhulāne vaalā hai

abhī ḳhayāl tire lams tak nahīñ pahuñchā

abhī kuchh aur ye manzar banāne vaalā hai

bujhe bujhe se ḳhad-o-ḳhāl par na jā ‘shahbāz’

yahī ufuq hai jo sūraj ugāne vaalā hai

Leave a Comment