Ek Aayat paDh Ke Apne-Ap Par Dam Kar Diya

ek aayat paḌh ke apne-āp par dam kar diyā

ham ne har chehre kī jānib dekhnā kam kar diyā

ehtirāman us ke qadmoñ meñ jhukā nādān maiñ

us ne merā qad hamesha ke liye kam kar diyā

mujh se auroñ kī judā.ī bhī sahī jaatī nahīñ

maiñ ne do bhīgī huī palkoñ ko bāham kar diyā

khil rahe haiñ mujh meñ duniyā ke sabhī nāyāb phuul

itnī sarkash ḳhaak ko kis abr ne nam kar diyā

kar rahe the ishq meñ suud o ziyāñ kā vo hisāb

un ke taḳhmīne ne merā dard bhī kam kar diyā

saath jitnī der rah luuñ kaun sā khultā hai vo

us ne dānista mire sheroñ ko mub.ham kar diyā

Leave a Comment