Ehsas-E-Be-Zaban Ki Latafat Isi Mein Thi

ehsās-e-be-zabāñ kī latāfat isī meñ thī

maiñ ne kahā na kuchh ki mohabbat isī meñ thī

ye shahar jis meñ naam kamānā muhāl thā

ham guftugū-e-shahr the shohrat isī meñ thī

vaise to dil ke TūTne kā kuchh nahīñ malāl

lekin tire jamāl kī sūrat isī meñ thī

achchhā huā ki dekhne aayā na vo hameñ

chehre pe pat-jhaḌoñ kī bhī izzat isī meñ thī

yārān-e-kam-nigāh use dekhte bhī kyā

ye sādgī ki saarī qayāmat isī meñ thī

Leave a Comment