Dushman Ko Zad Par Aa Jaane Do Dashna Mil Jaega

Hasan Abbas Raza

dushman ko zad par aa jaane do dashna mil ja.ega

zindanon ko toḌ nikalne ka rasta mil ja.ega

shah-savar ke kaT jaane ka dukh to hamen bhi hai lekin

tum parcham thame rakhna salar-e-sipah mil ja.ega

hamen ḳhabar thi shahr-e-panah par khaḌi sipah munafiq hai

hamen yaqin tha naqab-zanon se ye dasta mil ja.ega

soch-kaman salamat rakhni hogi tir-andaz bahut

kaun hadaf hai aur kahan hai us ka pata mil ja.ega

bas tum jabr ki choTi sar karne ka ahd javan rakhna

us tak jaane vaale raston ka naqsha mil ja.ega

hasan-‘raza’ uTh aur qadam avaz-e-jaras par rakh varna

shaah ka sar laane tujh sa koi divana mil ja.ega