Iqbal Sajid
duniya ne zar ke vaste kya kuchh nahin kiya
aur ham ne sha.eri ke siva kuchh nahin kiya
ghurbat bhi apne paas hai aur bhuuk nang bhi
kaise kahen ki us ne ata kuchh nahin kiya
chup-chap ghar ke sehn men faaqe bichha diye
rozi-rasan se ham ne gila kuchh nahin kiya
pichhle baras bhi boi thiin lafzon ki khetiyan
ab ke baras bhi is ke siva kuchh nahin kiya
ghurbat ki tez aag pe aksar paka.i bhuuk
ḳhush-haliyon ke shahr men kya kuchh nahin kiya
basti men ḳhaak aḌaa.i na sahra men ham ga.e
kuchh din se ham ne ḳhalq-e-ḳhuda kuchh nahin kiya
mangi nahin kisi se bhi hamdardiyon ki bhiik
‘sajid’ kabhi ḳhilaf-e-ana kuchh nahin kiya
Leave a Reply