Jameel Malik
doston ke darmiyan bhi ham ko tanha dekhte
tum kabhi aate sar-e-mahfil tamasha dekhte
a.ina-ḳhanon men kya rakkha hai hairat ke siva
kucha-o-bazar men ḳhun-e-masiha dekhte
maut ko bhi ham bana lete mata-e-zindagi
qatl yuun hote ki sab daana o biina dekhte
qais ki manind kyuun tasvir ban kar rah ga.e
parda-e-mahmil uTha kar ru-e-laila dekhte
men tumhare husn ka be-saḳhta iz.har huun
apne a.ine men mera bhi sarapa dekhte
DhunDne nikle hain tujh ko mavara-e-ab-o-gil
umr guzri yam-ba-yam sahra-ba-sahra dekhte
kya ye kam hai farsh se ta-arsh ho aa.e ‘jamil’
chaar din ki zindagi men aur kya kya dekhte
Leave a Reply