donon gharon ka lutf judagana mil gaya
ka.abe se ham chale the ki but-ḳhana mil gaya
saaqi se yuun subut-e-karimana mil gaya
paimana main ne manga tha mai-ḳhana mil gaya
dil kyuun na ham faroḳht karen is yaqin par
qimat bhi ab milegi jo bai.ana mil gaya
saaqi ki chashm-e-mast idhar aaj uTh ga.i
ham ko hamare zarf ka paimana mil gaya
karni paḌi na aur kahin justuju mujhe
ka.abe hi ke hudud men but-ḳhana mil gaya
mahshar men dekh kar unhen yuun shaad ho ga.e
goya hamen najat ka parvana mil gaya
mil kar bhi jal gaya ki bacha ye na puchhiye
itna hua ki sham.a se parvana mil gaya
ab dar-ba-dar ki Thokaren khane se kya gharaz
mujh ko ḳhuda-e-ka.aba-o-but-ḳhana mil gaya
allah re chashm-e-saqi-e-mahfil ka lutf-e-ḳhas
sab yuun hi rah ga.e mujhe paimana mil gaya
vo ḳhat men likh rahe hain tiri afiyat nahin
mujh ko adam ki raah ka parvana mil gaya
ai sailkan-e-jada-e-irfan baḌhe chalo
but-ḳhana mil gaya to ḳhuda-ḳhana mil gaya
tauqir-e-ishq ḳhaak uḌane se baḌh ga.i
ye hai ghalat ki ḳhaak men divana mil gaya
paa.e uruuj kyuun na hamari farotani
phula phala vo ḳhaak men jo daana mil gaya
josh-e-junun ke vaste ab kuchh na chahiye
virane ki talash thi virana mil gaya
paimana-o-subu ki zarurat nahin rahi
mujh ko mizaj-e-saqi-e-mai-ḳhana mil gaya
marqad se kushtagan-e-mohabbat nikal chuke
ab hashr tak ke vaste kashana mil gaya
ma.alum ham ne kar liye asrar-e-husn-o-ishq
taqdir se agar koi divana mil gaya
rakh li ḳhuda-e-ishq ne josh-e-junun ki sharm
ghar se nikalte hi mujhe virana mil gaya
vo kah ga.e ki phir koi tufan uTha.e
ai ‘nuh’ mujh ko shaghl-e-qadimana mil gaya
Leave a Reply