Diya Apni Rawish Par Kya Gaya Hai

diyā apnī ravish par kyā gayā hai

havā kā haath bhī ghabrā gayā hai

tumhāre phuul mujh tak aa ga.e haiñ

magar yuuñ bhejnā chauñkā gayā hai

hamāre ḳhvāb be-parda hue haiñ

hamārī aañkh meñ jhāñkā gayā hai

taḌap kar āñganoñ meñ dhuup bikhrī

galā bargad kā phir kaaTā gayā hai

saḌak par shor aur bhagdaḌ machā kar

mirī āvāz ko kuchlā gayā hai

kisī ke haath kaaTe jā rahe haiñ

kisī ke kaan se jhumkā gayā hai

diye kī bhuuk jañgal khā ga.ī hai

añdherā duur tak rotā gayā hai

tumhārā titliyoñ par vaar karnā

hamāre phuul bhī zaḳhma gayā hai

Leave a Comment