Zeb Ghauri
din tiri yaad men Dhal jaata hai aansu ki tarah
raat taḌpati hai ik nashtar-e-pahlu ki tarah
jaane kis soch men Duuba hua tanha tanha
dil ka aalam hai kisi sarv-e-lab-e-ju ki tarah
haa.e vahshat koi manzil ho Thaharta hi nahin
vaqt hai daam se chhuTe hue aahu ki tarah
rah ga.i ghuT ke mire dil men tamanna teri
ek parvaz-e-shikasta par-o-bazu ki tarah
majlis-e-shaiḳh men kal zikr tha jis ka ai dost
hogi jannat bhi koi shai tire pahlu ki tarah
‘zeb’ ab zad men jo aa jaa.e vo dil ho ki nigah
us ki raftar hai chalte hue jaadu ki tarah
Leave a Reply