Aisha Ayyub
din guzra aur shaam dhali phir vahshat le kar aai raat
jab bhi us ka hijr manaya ham ne vo kahlai raat
us ko rone se pahle kuchh ham ne yuun tayyari ki
kone men tanhai rakkhi kamre men phailai raat
tu ne kaise soch liya ki tere tohfe bhuul gae
dil ne tere gham ko pahna ankhon ko pahnai raat
savan aaya lekin sukhi ehsashon ki hariyali
banjar dil men aansu boe uupar se barsai raat
koi bhi mausam aaya ho ham par to barsat hui
us ki yadon ne jo ghera dopahron par chhai raat
us pal jaise bol paḌa ho divaron ka sannaTa
us ki rahen takte takte jaise ho uktai raat
kitne hi manzar shamil hain meri suuni ankhon men
chup ke se aa ke karti hai palkon ki turpai raat
chahat ki ye reshmi girhen aur palkon par niind ka bojh
yadon se jo bach nikle to ḳhvabon ne uljhai raat
Leave a Reply